ඉහත මාතෘකාව දෙස බැලූවිට ඔබට අනිවාර්යයෙන්ම සිහිපත් වන්නේ මනාප පොරයක් සහිත බල අරගලයකි. ලෞකික බලය ලබාගැනීම උදෙසා පැවැත්වෙන මැතිවරණ ක්‍රියාවලියකි. යම් යම් පුද්ගල චරිත හා පක්ෂ උදෙසා ස්වකීය කැමැත්ත ලබාදීමකි. මනාපය ලබාදීමකි.
විවාහ වීමේදී කෙනකුට කැමැත්ත ලබාදීම පිළිබඳ අදහසක් මෙහි තිබේ යැයි තවත් අයකුට සිතීමට පුළුවන. එහෙත් මෙම උතුම් ලිපිය තුළින් කියැවෙන්නේ ඉහත සඳහන් ලෞකික කටයුතු පිළිබඳ කැමැත්ත දීමක් හෝ මනාපය පළකිරීමක් ගැන නොවේ.
මේ ලිපියෙන් කියැවෙන්නේ නිවන් අවබෝධය සඳහා කැමැත්ත ඇති කර ගැනීම ගැනයි. මේ යුගය ශ්‍රී ලංකා ශාසන ඉතිහාසයේ ඉතා වැදගත්ම යුගයක් ලෙස සැලකීමට හැකිය. එයට හේතුව ශ්‍රී සද්ධර්මය පිළිබඳ පෙර නොවූ විරූ උනන්දුවක් උද්‍යෝගයක් බොදු ජනතාවට ඇති වීමයි. මෑත ඉතිහාසයේ බෞද්ධ පින්වතුන් මේ අයුරින් ධර්මයට යොමු වූ වෙනත් අවස්ථාවක් අපට සිහියට නැඟීමට නොහැකි තරම්ය. ඒ අතර විශේෂයෙන්ම තරුණ පිරිස විශාල වශයෙන් ධර්මය ශ්‍රවණය කිරීමට මෙන්ම දහම් වැඩසටහන් වලට සහභාගි වීමටද විශේෂ කැමැත්තක් දක්වන බව පෙනේ.
නූතන බෞද්ධයාගේ දහම් දැනුම වඩාත් දියුණු වෙමින් පවතින බව දැන් සාකච්ඡාවලදී මතුවී පෙනෙන කරුණකි. පෙර සිටි බොහෝ දැන උගත් බෞද්ධ අය පවා භාවිත නොකළ දහම් කරුණු අද සාමාන්‍ය බෞද්ධ පින්වතුන් භාවිත කරන බව පෙනේ. “තථාගතස්ස වේදිනෝ ධම්මෝ විවටෝ විරෝචති නෝ පටිච්ඡන්නෝ “ යන බුද්ධ වචනයට අනුව තථාගතයන් වහන්සේගේ ධර්මය බබළන්නේ විවෘත වූ විටයි. වසා තැබූ විට නොවෙයි. ඒ අනුව මේ වන විට අවුරුදු දහස් ගණනකට පසුව බුදුරජාණන් වහන්සේගේ ධර්මය යළිත් විවෘත වී තිබේ. දහ අට දහසකට ආසන්න සූත්‍ර දේශනා මේ වන විට මුළු මහත් ලෝකය පුරා විසිරී පවතී. දේශනා වෙමින් පවතී. සාකච්ඡා වෙමින් පවතී. විවිධ ජාතිකයන් විවිධ ආගමික අය මේ වන විට බුදුදහම වැළැඳ ගනිමින් සිටින අතර එහි ඇති යථාර්ථවාදී භාවයට කැමැති වී තිබේ. බොහෝ දෙනෙක් බුදුදහම ඉගෙන ගැනීමට ඉගැන්වීමට හා ඒ අනුව පුහුණු වීමට පෙළැඹී සිටිති.
ශාසන ඉතිහාසයට අනුව බුදුපියාණන් වහන්සේ වැඩ සිටි සැවැත් නුවර කෝටි හතක් පමණ ජනගහනයක් වාසය කොට ඇති අතර ඉන් කෝටි පහක්ම මාර්ගඵල ලාභී අය යැයි සඳහන් වේ. එමෙන්ම ශ්‍රී ලංකා බුදු සසුනේ ඉතිහාසය දෙස බලන විට මාර්ගඵල ලාභී උතුමන් දස දහස් ගණන් වැඩ සිටි බව දැනගන්නට ලැබේ. විශේෂයෙන්ම මහ රහතන් වහන්සේ දස දහස් ගණන් සිතුල්පව්ව වැනි පුදබිම්වලත් ශ්‍රී ලංකාවේ විවිධ විහාරස්ථානවලත් වැඩ සිටියහ. එසේ නම් මේ පුණ්‍ය භූමිය වරින් වර රහත් උතුමන්ගේ පහස ලද භූ®මියකි. දැන් එවන් යුගයක් බිහිවීමේ පෙර ලකුණු පහළ වී තිබේ. එහෙත් අප කළ යුතු වන්නේ ඒ පිළිබඳ උදම් ඇනීම හෝ සාකච්ඡා කරමින් සිටීම හෝ නොව මේ ලද උතුම් අවස්ථාවෙන් ප්‍රයෝජන ගෙන තථාගතයන් වහන්සේ සරණ ගොස් ධර්මය අවබෝධ කර ගැනීමට උත්සාහ කිරීමයි.
අංගුත්තර නිකායේ ද්විතීය භාගයේ චතුක්ක නිපාතයේ භණ්ඩගාම වර්ගයේ අනුසෝත සූත්‍රයට අනුව පුද්ගල කණ්ඩායම් සතරක් ඇත. ඒ අනුසෝත පුද්ගලයා, පටිසෝත පුද්ගලයා, ඨිතත්ත පුද්ගලයා හා ක්ෂීණාශ්‍රව බ්‍රාහ්මණ නම් කොට්ඨාස සතරයි. ඒ අතරෙන් පංච කාමයේ ඇලුණු පව්කම් රැස්කරන පුද්ගලයා අනුසෝත පුද්ගලයා නම් වේ. පටිසෝත පුද්ගලයා නම් පංචකාමයෙන් වෙන් වී කුසල් දහම් රැස් කරන පුද්ගලයායි. ඨිතත්ත පුද්ගලයා යනු පංච ඕරම්භාගීය සංයෝජන වන සක්කාය දිට්ඨි , විචිකිච්ඡා, සීලබ්බත පරාමාස, කාමරාග සහ පටිඝ යන ඒවා ක්ෂය කොට සුද්ධාවාස බ්‍රහ්ම ලෝකයේ ඉපිද පිරිනිවන්පාන පුද්ගලයායි. ක්ෂීණාශ්‍රව බ්‍රාහ්මණ නම් සංසාර සාගරය එතෙර කළ රහතන් වහන්සේය.
ඉහත සඳහන් කණ්ඩායම් අතරෙන් අප අනුසෝත පුද්ගලයකු බවට පත්නොවී පටිසෝත පුද්ගලයකු විය යුතුයි. එවිට අපට නිවන් ලබා ගැනීමේ කැමැත්ත ඇති කර ගත හැකිය. නිවන ලබා ගැනීමට කැමැති පුද්ගලයා ඡන්ද ඍද්ධිපාදය වැඩිය යුතුයි. එනම් නිවන ලබා ගැනීමට කැමැත්ත ඇති කරගෙන කටයුතු කළ යුතුයි. ඕනෑම දෙයකට කැමැත්ත ඇති කර ගැනීම පහසු වුවත් නිවන් අවබෝධ කර ගැනීම පිණිස කැමැත්ත ඇති කර ගැනීම ලෙහෙසි කටයුත්තක් නොවේ. එයට හේතුව අප එතරම් සසරට බැඳී සිටීමයි. මුල නොපෙනෙන තරම් දීර්ඝ වූ සංසාරයේ සිට පංචකාමයට ගොදුරුවී සිටීම නිසා අපගේ මනැසට පංචකාමයෙන් නිදහස් වීමේ කැමැත්තක් ඇති කර ගැනීම ඉතාම අපහසු කටයුත්තකි. එයට හේතුව පංච කාමයට මුළාවීමේ ගතිය එතරම්ම බරපතළ ලෙස සිතේ තැන්පත් වී තිබීමයි. පංච කාමයේ ආදීනවය ඒ අයුරින් සිතට කාවද්දා ගැනීම ලෙහෙසි නොවේ. ඒ නිසා ‘ නිස්සරණය’ හෙවත් පංච කාමයෙන් මිදීමට කැමැත්තක් පුද්ගලයාට පහසුවෙන් ඇති නොවේ. මේ අයුරින් කැමැත්ත ඇති කර ගැනීමට නොහැකිවීම නිසා මෙතෙක් අපට සංසාරයේ විඳීමට සිදුවූ වේදනා, කම්කටොලු, චිත්ත පීඩා, බෙලිකැපීම්, මරණයන් වචන වලින් විස්තර කළනොහැකිය. ඔබ නැවත නැවතත් මේ සසරේ ගමන් කිරීමට කැමැත්ත ඇති කර ගතහොත් මහා දුක් කන්දරාවක් විඳීමට සිදුවේ.
එබැවින් ඔබ කළ යුතු වන්නේ ඔබේ මනාපය සසරින් නිදහස් වීම සඳහා ලබාදීමයි. ඒ සඳහා තථාගත බුදුරජාණන් වහන්සේගේ බුද්ධ වචනය අදහා ගැනීම පළමුව කළ යුතුවේ. ගුණ හැඳින තෙරුවන් සරණ යාමත් කරුණු වටහාගෙන ශ්‍රද්ධාව දියුණුකර ගැනීමත් ඒ සඳහා අවශ්‍ය වේ. අමූලික ශ්‍රද්ධාව නොව අවශ්‍ය වන්නේ අකාරවතී ශ්‍රද්ධාවයි.
ඒ අනුව, ඔබ ඔබගේ ඡන්දය හෙවත් කැමැත්ත නිවන් අවබෝධ කර ගැනීම පිණිස ලබා දුනහොත් අනිවාර්යයෙන්ම ඔබට ඒ සඳහා ඉඩ ප්‍රස්ථාව ලැබෙනවාට කිසිදු සැකයක් නැත. ඉන් පසුව ඔබ ගමන් කරන්නේ ආර්ය අෂ්ටාංගික මාර්ගයේය. එනම් නිවන වෙත යන මාවතේය. එබැවින් ඔබ සියලු දෙනාද නියම ඡන්දයට සූදානම් වන්න.
ඔබට මේ ජීවිතයේදී උතුම් චතුරාර්ය සත්‍යය අවබෝධ කර ගැනීමට භාග්‍යය උදාවේවා!
පඤ්ඤාසිරි හිමි
ශ්‍රී බුද්ධ වර්ෂ 2555 ක් වූ නවම් පුර පසළොස්වක පොහෝ දින රාජ්‍ය වර්ෂ 2012 ක් වූ
පෙබරවාරි 07 වන අඟහරුවාදා දින බුදු සරණ පුවත්පතෙහි පළ වූ
ලිපියකින් උපුටා ගැනිමකි
No comments:
Post a Comment